स्व. शंकरराव कोल्हे यांचे स्वप्न साकार; विवेक कोल्हे यांच्या शपथविधीने संजीवनी कार्यस्थळी जल्लोष
कोपरगांव समाचार :- महाराष्ट्र विधानपरिषदेचे आमदार विवेक कोल्हे यांच्या शपथविधीने सहकारमहर्षी शंकरराव कोल्हे सहकारी साखर कारखाना कार्यस्थळावर जल्लोष करण्यांत आला.
सहकारमहर्षी शंकरराव कोल्हे सहकारी साखर कारखान्याचे अध्यक्ष व युवानेते विवेक कोल्हे यांची मुख्यमंत्री देवेंद्र फडणवीस यांनी भाजपाच्या कोटयातुन महाराष्ट्र विधानपरिषदेच्या आमदारपदी वर्णी लावली त्या शपथविधी सोहळयाचे थेट प्रक्षेपण गुरूवारी संजीवनी कार्यस्थळावर दाखविण्यांत आले. याप्रसंगी कारखान्याचे प्रभारी कार्यकारी संचालक टी. आर. कानवडे, मुख्य सीईओ शिवा कुमार, कामगार नेते मनोहर शिंदे, व्यवस्थापकीय व्यवस्थापक प्रकाश डुंबरे, संजीवनी ग्रुप हेड संजीव पवार, शेतकी अधिकारी नारायण चौधरी, कारखान्याचे सभासद, शेतकरी, विविध संस्थांचे आजी माजी पदाधिकारी यांच्यासह सर्व खातेप्रमुख, उपखातेप्रमुख, विविध विभागाचे कामगार मोठ्या संख्येने उपस्थित होते. प्रारंभी माजीमंत्री स्व. शंकरराव कोल्हे यांच्या प्रतीमेचे पुजन करण्यांत आले.
थेट प्रक्षेपणांत शपथविधीसाठी ज्यावेळी सचिव डॉ विलास आठवले यांनी युवानेते विवेक कोल्हे यांचे नावाची घोषणा केली त्यावेळी कारखाना सभागृहात टाळयांच्या कडकडाटात एकच जल्लोष करण्यांत आला. सभापती प्रा. राम शिंदे यांनी त्यांना पद व गोपनियतेची शपथ दिली त्यावेळी हर्षउल्हास करण्यांत आला. आमदार विवेक कोल्हे आगे बढो, हम तुम्हारे साथ है अशा घोषणा यावेळी देण्यांत आल्या. कामगार नेते मनोहर शिंदे याप्रसंगी बोलतांना म्हणाले की, माजीमंत्री स्व. शंकरराव कोल्हे यांनी जे स्वप्न पाहिले होते ते नातवाने पुर्ण केले.
