कोपरगाव शहरात शिवसृष्टी, मराठा भवन आणि वस्तीगृहाच्या कामांना गती द्या
सकल मराठा समाजाचे आमदार आशुतोष काळे यांना स्मरण पत्र
कोपरगाव समाचार:- कोपरगाव शहर आणि तालुक्यातील मराठा समाजाच्या प्रलंबित मागण्यांचा पाठपुरावा करण्यासाठी सकल मराठा समाज, कोपरगावच्या वतीने कोपरगाव विधानसभा मतदारसंघाचे आमदार आ. आशुतोष काळे यांना स्मरण निवेदन देण्यात आले. शहराच्या वैभवात भर घालणाऱ्या शिवसृष्टीची निर्मिती आणि समाजोपयोगी प्रकल्पांच्या प्रशासकीय मंजुरीबाबत समाजाकडून विचारणा करण्यात आली आहे.
याप्रसंगी विनय भगत, विजय जाधव, लक्ष्मण सताळे, अमित आढाव आदी मराठा बांधव आणि सकल मराठा समाजाचे पदाधिकारी मोठ्या संख्येने उपस्थित होते.
२ कोटी ३० लाखांचा निधी मंजूर, पण कामे रखडलेलीच
सकल मराठा समाजाने १२ नोव्हेंबर २०२४ रोजी दिलेल्या मूळ निवेदनाची आठवण करून देत हे स्मरण पत्र देण्यात आले. तत्कालीन निवेदनानुसार, आमदार निधीतून मराठा समाज भवनासाठी १ कोटी ३० लाख रुपये आणि साई कॉर्नर येथील गार्डनसाठी १ कोटी रुपये, असा एकूण २ कोटी ३० लाख रुपयांचा निधी मंजूर करण्यात आला आहे. मात्र, या मंजूर निधीची सद्यस्थिती काय आहे आणि त्याला प्रशासकीय मंजुरी कधी मिळणार, याबाबत समाजात अद्याप कोणतीही अधिकृत माहिती मिळालेली नाही.
सकल मराठा समाजाच्या प्रमुख मागण्या:
१. भव्य शिवसृष्टीची निर्मिती: महाराष्ट्रात प्रत्येक तालुक्यात शिवसृष्टी उभारली जात असताना, कोपरगाव शहरातही महाराष्ट्राच्या अस्मितेला शोभेल अशी सर्वात मोठी व भव्य शिवसृष्टी उभारण्यात यावी.
२. मराठा वस्तीगृह: मंजूर असलेल्या २ कोटी ३० लाख रुपयांच्या निधीमधूनच मराठा समाजातील विद्यार्थ्यांसाठी सुसज्ज वस्तीगृह उभारण्यात यावे.
३. राजमाता जिजाऊ उद्यान सुशोभीकरण: जिजाऊ उद्यानासाठी आधी मंजूर केलेल्या ५० लाख रुपयांमध्ये अधिक वाढीव निधी टाकून उद्यानाचे दर्जेदार सुशोभीकरण करावे.
आमदार निधीतून कोट्यवधींचा निधी मंजूर झाला असला, तरी प्रत्यक्षात कामाला सुरुवात न झाल्याने समाजाकडून चिंता व्यक्त केली जात आहे. आमदार आशुतोष काळे यांनी या सर्व विषयांवर गांभीर्याने विचार करून प्रशासकीय मंजुरी मिळवून द्यावी आणि या कामांची सद्यस्थिती स्पष्ट करावी, अशी आग्रही विनंती सकल मराठा समाज कोपरगाव शहर व तालुक्याच्या वतीने करण्यात आली आहे.
