निमंत्रणातून प्रोटोकॉल डावलला; बाजार समिती कार्यक्रमावर बहिष्काराची ठिणगी”
कोपरगाव समाचार :- कोपरगाव कृषी उत्पन्न बाजार समितीच्या वतीने रविवार (दि.२९) रोजी राष्ट्रसंत तुकडोजी महाराज शेतकरी भवनाचा भुमीपुजन समारंभ तसेच विविध विकास कामांचा लोकार्पण सोहळा आयोजित करण्यात आलेला आहे. मात्र या कार्यक्रमावर आम्ही बहिष्कार टाकला असल्याची माहिती कृषी उत्पन्न बाजार समितीचे उपसभापती व संचालकांनी दिलेल्या प्रसिद्धी पत्रकात दिली आहे.
दिलेल्या प्रसिद्धी पत्रकात उपसभापती व संचालकांनी असे म्हटले आहे की, कोपरगाव कृषी उत्पन्न बाजार समितीच्या वतीने रविवार (दि.२९) रोजी दुपारी १.३० वाजता राष्ट्रसंत तुकडोजी महाराज शेतकरी भवनाचा भुमीपुजन समारंभ तसेच विविध विकास कामांचा लोकार्पण सोहळा राज्याचे पणन, राजशिष्टाचार मंत्री ना. जयकुमार रावल यांच्या हस्ते आयोजित करण्यात आलेला आहे. मात्र या कार्यक्रमाच्या निमंत्रण पत्रिकेमध्ये जिल्ह्याचे पालकमंत्री तथा जलसंपदा मंत्री नामदार राधाकृष्ण विखे पाटील यांचे राजशिष्टाचार (प्रोटोकॉल) नुसार नामोल्लेख न करणे तसेच माजी आमदार अशोकराव काळे यांचा निमंत्रण पत्रिकेत ज्येष्ठतेनुसार नामोल्लेख न करता फक्त औपाचिरकता म्हणुन नको त्याठिकाणी नामोल्लेख करण्यात आला आहे.
