कान्हेगाव रेल्वे ट्रॅक जवळ पादचारी भुयारी मार्गाला मंजुरी - खा.भाऊसाहेब वाकचौरे
कोपरगाव समाचार:-- कान्हेगाव येथील हनुमानवाडी परिसरात पादचारी नागरिक, विद्यार्थी व स्थानिक रहिवाशांच्या सुरक्षिततेसाठी महत्त्वपूर्ण ठरणाऱ्या पादचारी भुयारी मार्गाच्या (सबवे) बांधकामास मान्यता देण्यात आली आहे. याबाबत पुणे येथील विभागीय रेल्वे व्यवस्थापक अनिल कुमार पाठक यांनी खा.वाकचौरे यांना लेखी पत्राद्वारे उत्तर कळविले आहे.
गेल्या अनेक दिवसांपासून खा.वाकचौरे याबाबतीत दिल्ली दरबारी पाठपुरावा करत होते. त्यामुळे कान्हेगाव व कोपरगाव रेल्वे स्थानकांदरम्यान रेल्वे किमी ४५०/४-५ या ठिकाणी हा पादचारी भुयारी मार्ग मंजूर करण्यात आला असून रेल्वे रुळ ओलांडताना होणारे अपघात टाळण्यास मोठी मदत होणार आहे. विशेषतः शेजारीच असणाऱ्या शालेय विद्यार्थ्यांसाठी, वृद्ध नागरिक आणि शेतकरी यांना याचा मोठा फायदा होणार आहे. रेल्वे प्रशासनाकडून मिळालेल्या माहितीनुसार सबवेसाठी आवश्यक असलेले जनरल अरेंजमेंट ड्रॉइंग (GAD) सध्या मंजुरीच्या प्रक्रियेत आहे. ही मंजुरी मिळताच प्रत्यक्ष बांधकामास सुरुवात करण्यात येणार आहे.
दरम्यान खा.भाऊसाहेब वाकचौरे यांनी पुणे विभागाचे रेल्वे अधिकारी, कोपरगाव तहसीलदार आणि रेल्वे मार्गालगतचे रहिवाशी यांची संयुक्त बैठक आपल्या अध्यक्षतेखाली कोपरगाव तहसील कार्यालयात लावली होती, त्याचीही दखल घेऊन प्रवासी व स्थानिक नागरिकांच्या सुरक्षिततेसाठी सार्वजनिक जागा खुल्या करून उर्वरित दौंड–मनमाड रेल्वे विभागात कुंपण घालण्याचे कामही युद्धपातळीवर सुरू असल्याची माहिती देण्यात आली आहे. या उपाययोजनांमुळे अनधिकृत रेल्वे मार्ग ओलांडण्याच्या दुर्घटना कमी होतील, असा विश्वास व्यक्त करण्यात येत आहे.
यामुळे कान्हेगाव-भोजडे ग्रामस्थांना अधिक फायदा होणार असून भोजडे विकास सोसायटीचे चेअरमन तथा शिवसेनेचे जिल्हा समन्वयक मुकुंद सिनगर यांनी खा.वाकचौरे यांचे जाहीर आभार मानले आहेत. यावेळी सतत पाठपुरावा करणारे कान्हेगाव-वारी येथील शिवसेनेचे जेष्ठ नेते गोरख टेके, तान्हाजी थोरमिसे, तालुका संघटक अशोक कानडे, पत्रकार प्रशांत टेके, सामाजिक कार्यकर्ते अशोक आप्पा काजळे यांच्यासह स्थानिकांनी फटाके फोडून आनंद व्यक्त केला आहे.
