कोपरगाव नगरपरिषदेला १ कोटींची विकासाची संजीवनी-- पराग संधान
कोपरगाव समाचार:-राज्य शासनाच्या हिंदुहृदयसम्राट बाळासाहेब ठाकरे नागरी लोककल्याण अभियान अंतर्गत कोपरगाव नगरपरिषदेस शाळा, महिला आरोग्य आणि विविध नागरी सुविधांच्या उभारणीसाठी १ कोटी रुपयांचे प्रोत्साहनपर अनुदान मंजूर करण्यात आले आहे.
या निधीमुळे शहरातील मूलभूत सुविधा बळकट होण्यास मोठी मदत होणार असून शिक्षण, आरोग्य व नागरी विकासाच्या कामांना गती मिळणार आहे.नगराध्यक्ष पराग संधान यांनी या अनुदानाबद्दल राज्य शासनाचे मनःपूर्वक आभार व्यक्त केले. शहराच्या सर्वांगीण विकासासाठी शासन सातत्याने सकारात्मक भूमिका घेत असून या निधीच्या माध्यमातून अनेक महत्त्वाच्या कामांना चालना मिळेल, असा विश्वास त्यांनी व्यक्त केला.या अनुदानातून शहरातील शाळांच्या पायाभूत सुविधांमध्ये सुधारणा, महिला आरोग्याशी संबंधित उपक्रमांना बळकटी, तसेच नागरिकांसाठी आवश्यक असलेल्या विविध नागरी सुविधा उभारण्याचे काम हाती घेतले जाणार आहे. त्यामुळे कोपरगाव शहरातील नागरिकांना अधिक चांगल्या दर्जाच्या सेवा उपलब्ध होण्यास मदत होणार आहे.नगराध्यक्ष पराग संधान यांनी सांगितले की, शहरातील विकासकामांना प्राधान्य देत नागरिकांच्या दैनंदिन जीवनात सकारात्मक बदल घडवून आणण्याचा नगरपरिषदेचा प्रयत्न आहे.
या निधीच्या माध्यमातून शहरातील काही प्रलंबित कामे मार्गी लागतील तसेच आगामी काळात नागरिकांना अधिक सोयी-सुविधा उपलब्ध करून देण्यासाठी नगरपरिषद कटिबद्ध आहे.यावेळी नगराध्यक्षांनी राज्याचे मुख्यमंत्री देवेंद्र फडणवीस तसेच राज्य शासनाचे विशेष आभार मानले. शासनाच्या सहकार्यामुळे कोपरगाव शहराच्या विकासाला निश्चितच गती मिळेल व शहर अधिक सक्षम व सुविधायुक्त बनविण्याचा मार्ग सुकर होईल, असा विश्वासही त्यांनी व्यक्त केला.या निर्णयामुळे कोपरगाव शहरातील शिक्षण, महिला आरोग्य आणि नागरी सुविधा क्षेत्रात लक्षणीय सुधारणा होण्याची अपेक्षा व्यक्त करण्यात येत आहे.
